І зноў танцуе "Берагіня"…
На ўсю сілу буяе вясна. Хутка напоўняцца новымі падзеямі самыя працяглыя па часе школьныя канікулы. А ў памяці ўдзельнікаў фальклорнага гурту "Берагіня" зноў і зноў усплываюць шчаслівыя імгненні іх творчага жыцця, якімі быў напоўнены гэты навучальны год. Былі выступленні ў навучальных установах раёна, удзел у Мінскіх адкрытых конкурсах "Кацігарошак" (апавядальнікаў народнай прозы) і "Ветразь" (выканаўцаў беларускіх народных танцаў) і г.д..
Заключным, справаздачным мерапрыемствам гэтага навучальнага года стала выступленне Заслужанага аматарскага калектыва Рэспублікі Беларусь узорнага фальклорнага гурту "Берагіня" перад роднай школьнай сям’ёй: сябрамі, настаўнікамі, бацькамі, аднавяскоўцамі. Традыцыйны "Канцэрт у майскім садзе" адбыўся 17 мая. На ім выступілі не толькі самі берагінцы, але і малодшая група "Зярняткі" - спадкаемцы "Берагіні", і самыя маленькія - дашкольнікі і першакласнікі. "Артысты" падарылі гледачам радасныя эмоцыі, бацькоў і настаўнікаў перапаўняў гонар за кожнага, хто танчыў, спяваў, іграў, апавядаў.
Пасля канцэрта кожнаму з бацькоў, чые дзеці атрымоўваюць мастацкую адукацыю ў гэтым вядомым і адметным калектыве, былі ўручаны лісты падзякі. Словы ўдзячнасці ад кіраўнікоў калектыву за клопат пра дастойнае існаванне "Берагіні", пра спрыяльныя ўмовы для яе дзейнасці былі выказаны ў адрас дырэктара ўстановы адукацыі А.А. Сіняка і яго намеснікаў А.В.Крачкоўскай, М.А.Міцянінай, Г. М.Абрамовіч.
А наперадзе - зноў навучальны год, а значыць, зноў праца, радасць, прыгожыя эмоцыі. Заснаванае на добрых традыцыях, школьнае жыццё зноў будзе ўзнёслым, творча насычаным, духоўна багатым. А значыць, будуць выхоўвацца ў школе сапраўдныя патрыёты роднай Бацькаўшчыны, сапраўдныя людзі зямлі беларускай!